ၵူၼ်းမၢၵ်ႈမီး လႄႈ ၵူၼ်းၽၢၼ် ပၢႆးဝူၼ်ႉၶဝ်ပိူင်ႈၵၼ်ၸိူင်ႉႁိုဝ်

ၵူၼ်းမၢၵ်ႈမီး လႄႈ ၵူၼ်းၽၢၼ် ပၢႆးဝူၼ်ႉၶဝ်ပိူင်ႈၵၼ်ၸိူင်ႉႁိုဝ်

ၵူၼ်းၸိူဝ်းဢၼ်မၢၵ်ႈမီးၶဝ်ၼၼ်ႉ မၢၵ်ႈမီးၶိုၼ်ႈယူႇတိၵ်းတိၵ်းသေ၊ ၵူၼ်းၽၢၼ်သမ်ႉ ၽၢၼ်လူင်းယူႇတိၵ်းတိၵ်း။ ယွၼ်ႉပိူဝ်ႈသင်၊ ပဵၼ်သင်လႄႈ ပဵၼ်ၸိူင်ႉၼႆ၊ ႁဝ်းဢွၼ်ၵၼ် မႃးလဵပ်ႈႁဵၼ်းပၢႆးဝူၼ်ႉၶဝ် ပႅၵ်ႇပိူင်ႈၵၼ်ၸိူင်ႉႁိုဝ်ဢိတ်းၼိုင်ႈ။

• ၵူၼ်းမၢၵ်ႈမီး ဝူၼ်ႉၵႂၢင်ႈႁၼ်ၵႆ၊ ၵူၼ်းၽၢၼ် ဝူၼ်ႉၵႅပ်ႈ (ဝူၼ်ႉၶၢဝ်းပွတ်း) 

ႁဝ်းတႅၵ်ႈတူၺ်း ၵူၼ်းမၢၵ်ႈမီးလႄႈ ၵူၼ်းၽၢၼ်ၸႂ်ႉတိုဝ်းငိုၼ်းၼၼ်ႉ၊ ၵူၼ်းမၢၵ်ႈမီး တေဢဝ်ငိုၼ်းသိုဝ်ႉၶူဝ်းၶွင် ဢၼ်တေၶီႈဢွၵ်ႇပၼ်ငိုၼ်းၶဝ်။ ၵူၼ်းၽၢၼ်သမ်ႉ ဢဝ်ငိုၼ်းသိုဝ်ႉၶူဝ်းၶွင် တႃႇၸၢမ်ႇပူၺ်ႈ၊ ဝူၼ်ႉလွင်ႈမူၼ်ႈသိူဝ်းၶၢဝ်းပွတ်းသေ ၸၢႆႇငိုၼ်းမူတ်း၊ ပေႃးယဝ်ႉ ပႂ်ႉငိုၼ်းလိူၼ်ဢွၵ်ႇ။  

• ၵူၼ်းမၢၵ်ႈမီး ဢဝ်ၸႂ်ပၵ်းၼိူဝ် သုၼ်ႇလီတိုဝ်ႉတၢင်း၊ ၵူၼ်းၽၢၼ် ဢဝ်ၸႂ်ပၵ်းၼိူဝ်လွင်ႈယၢပ်ႇၽိုတ်ႇ

ၵူၼ်းမၢၵ်ႈမီးၶဝ် မေႃဢဝ်ပၼ်ႁႃ ပဵၼ်သုၼ်ႇလီတိုဝ်ႉတၢင်း၊ ၶဝ်မေႃဝူၼ်ႉၶူၼ်ႉသွၵ်ႈဢွၵ်ႇ သုၼ်ႇလီတိုဝ်ႉတၢင်း တႃႇၶဝ် ၼႂ်းၵၢၼ်ဢၼ်ၶဝ်ႁဵတ်းၵူႈလွင်ႈလွင်ႈ။ ၵူၼ်းၽၢၼ် တေႁဵတ်းသင်ၵေႃႈ ဝူၼ်ႉဝႃႈ ယၢပ်ႇၼႃႇ၊ ဢမ်ႇပဵၼ်လႆႈ။ မေႃၶၢင်းဝႃႈ ပဵၼ်ၸိူင်ႉၼၼ်ၸိူင်ႉၼႆ၊ ၶဝ်တေဝူၼ်ႉထိုင်လွင်ႈယၢပ်ႇၽိုတ်ႇဢွၼ်တၢင်း။ 

• ၵူၼ်းမၢၵ်ႈမီး ႁူမ်ၸူမ်းၸွမ်းတၢင်းမၢၵ်ႈလႄႈတၢင်းဢွင်ႇမၢၼ်ၵူၼ်းတၢင်ႇၵေႃႉ၊ ၵူၼ်းၽၢၼ် ဢမ်ႇႁၢၼ်ႉၸႂ် မိူဝ်ႈႁၼ်ၵူၼ်းတၢင်ႇၵေႃႉၶဝ် ဢွင်ႇမၢၼ်ၼႂ်းၸူဝ်ႈပၢၼ်

ၵူၼ်းမၢၵ်ႈမီး မေႃႁူမ်ၸူမ်းၸွမ်း မိူဝ်ႈႁၼ်ပိူၼ်ႈဢွင်ႇမၢၼ်၊ မေႃတူၺ်းတၢင်းဢွင်ႇမၢၼ်ပိူၼ်ႈသေ ပၼ်ႁႅင်းၸႂ်တူဝ်ၵဝ်ႇဝႃႈ ဝၼ်းၼိုင်ႈၵဝ်ၵေႃႈ တေၶတ်းၸႂ်ႈႁႂ်ႈမၢၵ်ႈမီး၊ ႁႂ်ႈဢွင်ႇမၢၼ်ၼင်ႇၶဝ်။ ၵူၼ်းၽၢၼ်သမ်ႉ ပေႃးႁၼ်ပိူၼ်ႈၶိုၼ်ႈယႂ်ႇလိူဝ်ၶဝ်ၼႆ မေႃမီးၸႂ်ဢမ်ႇၼႃႇလူဝ်ႇပိူၼ်ႈ။ ၶႂ်ႈယႃႉႁႂ်ႈပိူၼ်ႈတူၵ်းတႅမ်ႇ။ ၵူၼ်းဝူၼ်ႉႁႂ်ႈပိူၼ်ႈတူၵ်းတႅမ်ႇၼႆႉ ယိုင်ႈၶႅၼ်းတေတူၵ်းတႅမ်ႇၵႂႃႇတိၵ်းတိၵ်း။ 

• ၵူၼ်းမၢၵ်ႈမီး မီးၸႂ်ၶႂ်ႈယုၵ်ႉမုၼ်းတူဝ်ၶဝ်လႄႈ ၵႃႈၶၼ်တူဝ်ၶဝ်၊ ၵူၼ်းၽၢၼ်ဝူၼ်ႉသၢၼ်ၶတ်း ၵၢၼ်ၶၢႆ လႄႈ ၵၢၼ်ယုၵ်ႉမုၼ်းၵၢၼ်ၶၢႆ (Selling and Promotion) 

ၵူၼ်းမၢၵ်ႈမီးၶဝ်ၼၼ်ႉ ပုၼ်ႈတႃႇၸူဝ်ႈပၢၼ်ၶဝ်တေလီ၊ တေမီးၵႃႈၶၼ်မႃးၼၼ်ႉ ၶဝ်ၶတ်းၸႂ်ယူႇတႃႇသေႇယဝ်ႉ။ ၵူၼ်းၽၢၼ်သမ်ႉဝူၼ်ႉဝႃႈ ၵၢၼ်ဢၼ်လႆႈႁွင်ႉသႅၼ်ႇၶၢႆၶူဝ်းယူႇၼၼ်ႉ ပဵၼ်ၵၢၼ်ၼႃႈလီဢၢႆယဝ်ႉ။ ၶဝ်ဝူၼ်ႉဝႃႈ ၵၢၼ်ၶၢႆၼၼ်ႉ ပဵၼ်ၵၢၼ်ၼႃႈလဵၵ်ႉ၊ ဢမ်ႇမီးၵုင်ႇမုၼ်သင် ၼႆယဝ်ႉ။ 

• ၵူၼ်းမၢၵ်ႈမီး လိူၵ်ႈႁဵတ်းၵၢၼ် ဢၼ်လႆႈၼမ်ႉတွၼ်း လူၺ်ႈတၢင်းၶတ်းၸႂ်ၶဝ်၊ ၵူၼ်းၽၢၼ် လိူၵ်ႈႁဵတ်းၵၢၼ် ဢၼ်လႆႈၼမ်ႉတွမ်း ၸွမ်းၼင်ႇၶၢဝ်းယၢမ်း

လၢတ်ႈငၢႆႈငၢႆႈၵေႃႈ ၵူၼ်းမၢၵ်ႈမီးၶဝ် ႁဵတ်းၵၢၼ်တူဝ်ၵဝ်ႇသေ ႁပ်ႉဢဝ်ၼမ်ႉတွၼ်း ဢၼ်တူဝ်ၶဝ်ၶိုၼ်းပၼ်ၶဝ်။ ၵူၼ်းၽၢၼ်သမ်ႉ ႁဵတ်းၵၢၼ်သေ ပႂ်ႉငိုၼ်းလိူၼ်ဢွၵ်ႇ။ ၵူၼ်းမၢၵ်ႈမီးၶဝ်ၼၼ်ႉ မိူဝ်ႈပႆႇတင်ႈတူဝ်လႆႈ ၶဝ်ႁဵတ်းၵၢၼ်ပၼ်ပိူၼ်ႈယူႇၵေႃႈ ၶဝ်ဢမ်ႇၸႂ်ႈၵူၼ်းပႂ်ႉၵိၼ်ငိုၼ်းလိူၼ်ပိူင်လဵဝ်၊ ၶဝ်ပေႃးမီးၵၢၼ်ဝၢင်းၽႅၼ်ဝႆႉ ၶၢဝ်းယၢဝ်းၵမ်းလဵဝ်ယဝ်ႈ။ 

•   ၵူၼ်းမၢၵ်ႈမီး မေႃၸတ်းၵၢၼ်ငိုၼ်းၶဝ်လႆႈလီ၊ ၵူၼ်းၽၢၼ် ၶၢတ်ႇလွင်ႈၸတ်းၵၢၼ်ငိုၼ်း 

ၵူၼ်းမၢၵ်ႈမီးၶဝ်ၼႆႉ မေႃၸတ်းၵၢၼ်ငိုၼ်းၶဝ် လႆႈလီလီ၊ ၼင်ႇႁိုဝ်တေမေႃၼၼ်ႉၵေႃႈ ၶဝ်လဵပ်ႈႁဵၼ်းယဝ်ႉ။ ၵူၼ်းၽၢၼ်ၶဝ်သမ်ႉ ဢမ်ႇမီးတၢင်းႁူႉလွင်ႈၵၢၼ်ငိုၼ်း၊ တႃႇတေမေႃၼၼ်ႉၵေႃႈ ဢမ်ႇလဵပ်ႈႁဵၼ်း။ ႁႂ်ႈၵူၼ်းၽၢၼ်ၶဝ် ပွၵ်ႈထီႇတူၺ်းလႄႈ ဢမ်ႇပူၼ်ႉလၢႆလိူၼ် လႆၢပီ ငိုၼ်းၸိူဝ်းၼၼ်ႉ တေႁၢႆလၢႆမူတ်းယဝ်ႉ။ ၵဵဝ်ႇလူၺ်ႈလွင်ႈၵၢၼ်ငိုၼ်းၼႆႉ ထုၵ်ႇလီလူပပ်ႉ ၽူႈမၢၵ်ႈမီးလူင် ၼႂ်းမိူင်းပေႇပီႇလုၼ်ႇၶဝ်၊ ပပ်ႉပေႃႈၽၢၼ် ပေႃႈမၢၵ်ႈမီးၶဝ် လႄႈ ၶေႃႈသိူင်ႇလပ်ႉ ၽူႈမၢၵ်ႈမီးၶဝ်ၸိူဝ်းၼႆႉယူႇ။ 

• ၵူၼ်းမၢၵ်ႈမီး ႁႂ်ႈငိုၼ်းႁဵတ်းၵၢၼ်ပၼ်ၶဝ်၊ ၵူၼ်းၽၢၼ်သမ်ႉ ႁဵတ်းၵၢၼ်ပုၼ်ႈတႃႇငိုၼ်း

မီးၵူၼ်းႁဵတ်းၵၢၼ်တၢင်းၼမ်ၶၢင်းပွင်ႉဝႃႈ ꧦႁဝ်းၼႆႉ ႁဵတ်းၵၢၼ်ႁိူဝ်ႇလႆၶႆးယွႆႉ ၵူၺ်းၵႃႈ လႆႈငိုၼ်းဢိတ်းၼိုင်ႈၵူၺ်း၊ ၵူၼ်းမၢင်ၸိူဝ်းၼႆႉ ဢမ်ႇလႆႈႁဵတ်းသင်ၵေႃႈ ပေႉၵႅၼ်ႇမီးငိုၼ်းꧦ ၼႆယူႇ။ တီႈၼႆႈတႄႉ ဢမ်ႇတၢပ်ႈသပ်းလႅင်းၼႄယၢပ်ႇသင်၊ တူၺ်းဢဝ်ၸဝ်ႈၶွင်ႁူင်းၵၢၼ် ၵုမ်ႇပၼ်ႇၼီႇ လႄႈ ၵူၼ်းႁဵတ်းၵၢၼ်ၵူၺ်းၵေႃႈ ပွင်ႇၸႂ်ယဝ်ႉ။ မၼ်းယူႇတီႈ ၵၢၼ်ဝၢင်းၽႅၼ်ၸူဝ်ႈပၢၼ်လႄႈ တၢင်းလိူၵ်ႈပႆႁဝ်းၵူၺ်း။ တေဢဝ်ငိုၼ်း ဢၼ်ႁဝ်းမီးၼၼ်ႉ ႁဵတ်းၵၢၼ်ပၼ်ႁဝ်းႁ ဢမ်ႇၼၼ် တေၶၢမ်ႇယၢပ်ႇသေ ႁဵတ်းၵၢၼ်ပုၼ်ႈတႃႇလႆႈငိုၼ်းၵႂႃႇတိၵ်း။ ယူႇတီႈတၢင်းယိူၼ်းဢၢၼ်း၊ တၢင်းၶႂ်ႈပဵၼ်၊ တၢင်းလိူၵ်ႈႁဝ်းၵူၺ်း။ ထႅင်ႈသိပ်းပီတၢင်းၼႃႈၼၼ်ႉ သင်ဝူၼ်ႉဝႃႈ တေဢၢၼ်းလွတ်ႈလႅဝ်း တႂ်ႈၶီႈၶႃႈငိုၼ်းၵေႃႈ သိုပ်ႇလူထႅင်ႈ တွၼ်ႈၵမ်းလိုၼ်းသုတ်းၼႆႉလႄႈ။ 

• ၵူၼ်းမၢၵ်ႈမီးၶဝ် တေႁဵၼ်းႁူႉယူႇတႃႇသေႇ၊ ၵူၼ်းၽၢၼ်သမ်ႉဝူၼ်ႉဝႃႈ ၶဝ်ႁူႉၵူႈလွင်ႈလွင်ႈယဝ်ႉ

ၵူၼ်းမၢၵ်ႈမီးၶဝ်ၼၼ်ႉ ၶဝ်တေလဵပ်ႈႁဵၼ်း လွင်ႈဢၼ်မႂ်ႇမႂ်ႇ ဢၼ်ၶဝ်ပႆႇႁူႉၼၼ်ႉယူႇတႃႇသေႇ။ ပေႃးဢမ်ႇယုမ်ႇၵေႃႈ တႅမ်ႈႁႃၼိူဝ် www.google.com တူၺ်းလႄႈ Bill Gates ၸဝ်ႈၶွင်ႁူင်းၵၢၼ် မႆၢႇၶရူဝ်ႇသွပ်ႉ လူလိၵ်ႈၼိုင်ႈဝၼ်း လၢႆၸူဝ်ႈမူင်း။ ၵူၼ်းမၢၵ်ႈမီးၶဝ်ၼႆႉ ဢၼ်ၶဝ်ဢမ်ႇႁူႉၼၼ်ႉ ၶဝ်တေထၢမ်ပိူၼ်ႈ၊ လဵပ်ႈႁဵၼ်းဢဝ်တီႈၵူၼ်းတၢင်ႇၵေႃႉယဝ်ႉ။ တႃႇတေလႆႈတၢင်းႁူႉမႂ်ႇမႂ်ႇၼၼ်ႉ ၶဝ်ဢမ်ႇတွၼ်ႉဢိုတ်းပႅတ်ႈၽၵ်းတူဝ်ႁူဝ်ၸႂ်ၶဝ်။ ဢၼ်ယၢပ်ႇၼၼ်ႉသမ်ႉ ၵူၼ်းၽၢၼ်ၶဝ်ၼႆႉ ၶဝ်ဝူၼ်ႉဝႃႈ ၶဝ်ႁူႉပႅတ်ႈမူတ်းၵူႈလွင်ႈၼၼ်ႉယဝ်ႉဝႃႈ။ တႃႇတေၵိူင်းႁူထွမ်ႇပိူၼ်ႈၵူၺ်းၵေႃႈ ၶဝ်ၶၢၼ်ႉယဝ်ႉ။ 

ယုမ်ႇဝႃႈ တေလႆႈတၢင်းႁူႉ တီႈလိၵ်ႈဢၼ်ၼႆႉ ယူႇၽွင်ႈ။ 

ဢၼ်လႆႈတႅမ်ႈၼႄ လွင်ႈၵူၼ်းၽၢၼ် လႄႈ ၵူၼ်းမၢၵ်ႈမီး ၶဝ်ပိူင်ႈၵၼ်ၸိူင်ႉႁိုဝ်ၼႆႉ ဢမ်ႇၸႂ်ႈၽူႈတႅမ်ႈပဵၼ်ၽူႈဢွင်ႇမၢၼ် ပဵၼ်ၽူႈမၢၵ်ႈမီး၊ ၵူၺ်းၵႃႈ ၸႂ်ဢၼ်ၶႂ်ႈႁႂ်ႈတူဝ်ၵဝ်ႇမၢၵ်ႈမီးလႄႈ ဢၼ်ၶႂ်ႈႁႂ်ႈတႆးမၢၵ်ႈမီးၼၼ်ႉ မီးတဵမ်ဝႆႉယူႇ။ Bill Gates လၢတ်ႈဝႃႈ ꧦ ဢၼ်သူ ၵိူတ်ႇမႃးပဵၼ်ၵူၼ်းၽၢၼ်ၼႆႉ ဢမ်ႇၸႂ်ႈတၢင်းၽိတ်းသူ၊ သင်ဝႃႈ သူလႆႈတၢႆၵႂႃႇၶိုၼ်း ယၢၵ်ႈယၢၵ်ႈၽၢၼ်ၽၢၼ်တႄႉ ပဵၼ်တၢင်းၽိတ်းသူယဝ်ႉ ꧦ  ၼႆယူႇ။ လွင်ႈသင်ၵေႃႈယဝ်ႉ ပေႃးႁဝ်းမီးတၢင်းၶတ်းၸႂ်၊ ပေႃးႁဝ်းမီးတၢင်းတင်ႈၸႂ်၊  ပေႃးႁဝ်းမီးႁႅင်းၸႂ်၊ ပေႃးႁဝ်းမီးၺၢၼ်ႇတၢင်းႁူႉ ႁဝ်းတိုၼ်းပဵၼ်လႆႈၵူႈလွင်ႈ။ ယႃႇပေၵုမ်ႇၼင်ႈပွင်ႉၵၢမ်ႇယူႇ၊ ဢၼ်ၼင်ႈပွင်ႉယူႇၼၼ်ႉၵေႃႈ ပဵၼ်ၵၢမ်ႇမိူၼ်ၵၼ်ယဝ်ႉ။ 

မွၼ်းၶိူဝ်း (မိူင်းၼွင်) 

ဢိင်- https://www.youtube.com/watch?v=proKvZTLqeI

သိုပ်ႇလဵပ်ႈႁဵၼ်းတီႈၵႂၢင်ႈလႆႈတီႈ ၊ the Secrets of the Millionaire Mind: Mastering the Inner Game of Wealth by T. Harv Eker