တေႁၵ်ႉ ဢၼ်ႁဝ်းႁဵတ်းႁိုဝ် တေႁဵတ်း ဢၼ်ႁဝ်းႁၵ်ႉ

ၶေႃႈထၢမ် ဢၼ်ၵႆႉၶမ်ၸႂ်ၸွမ်းတႃႇသေႇ မိူဝ်ႈထၢမ်တူဝ်ၵဝ်ႇၼၼ်ႉ ပဵၼ်ၶေႃႈထၢမ်ဢၼ်ဝႃႈ ၵဝ်ႁၵ်ႉသင် ၵဝ်ၶႂ်ႈပဵၼ်သင် ၼႆၼၼ်ႉယဝ်ႉ။ ၵူၼ်းႁဝ်းၵူႈၵေႃႉ ၽႂ်ၽႂ်ၵေႃႈ ၶတ်းၸႂ်ၸွမ်းသွၵ်ႈႁႃ ဢၼ်တူဝ်ၵဝ်ႇႁၵ်ႉလႄႈ ဢၼ်တူဝ်ၵဝ်ႇၶႂ်ႈႁဵတ်းၼၼ်ႉ ႁင်းၽႂ်မၼ်း။ လွင်ႈတၢင်းတႄႉ ၵွပ်ႈဝႃႈ လႆႈထွမ်ႇၶေႃႈၵႂၢမ်း ဢၼ်ဝႃႈ ꧦႁဵတ်း ဢၼ်သူႁၵ်ႉလႄႈꧦ ၼႆၼၼ်ႉယဝ်ႉ။ မီးယူႇၶမ်ႈၼိုင်ႈ ၵဝ်ၶႃႈၼွၼ်းသေဝူၼ်ႉထိုင်လွင်ႈၼႆႉ။ မၼ်းႁဵတ်းႁႂ်ႈၵဝ် ၶႃႈဢမ်ႇသိူဝ်းၸႂ်သေဢိတ်း။ ယိုင်ႈဝူၼ်ႉယိုင်ႈၶမ်ၸႂ်မႃး၊ ၸူဝ်ႈပၢၼ်ၶႃႈၼႆႉ မၼ်းမိူၼ်ၵႂၢမ်းဢၼ်ပီႈၸႆၢးၸိူင်း ႁၢၼ်ႁွင်ႉဝႆႉဝႃႈ ꧦၸႂ်ၽႅဝ်တီႈယိူင်းဢၢၼ်းယဝ်ႉ တူဝ်ႁႃသဵၼ်ႈတၢင်းသမ်ႉပႆႇႁၼ်ꧦ ၼႆၼၼ်ႉဝႆႉ။ ၶႃႈၶႂ်ႈဢွင်ႇမၢၼ် ၵူၺ်းၵႃႈ ၶႃႈတေလႆႈႁဵတ်းသင် ဢၼ်ၼႆႉမိူၼ်တၼ်တိၵ်းၼိၵ်း ဢမ်ႇႁၼ်သဵၼ်ႈတၢင်းမၼ်းသေဢိတ်း။ ယွၼ်ႉလွင်ႈၼႆႉလႄႈ ၶႃႈၸင်ႇမႃးဝူၼ်ႉသေ တႃႇၵဝ်တေဢွင်ႇမၢၼ်ၼၼ်ႉ ၵဝ်တေလႆႈႁဵတ်းဢၼ်ၵဝ်ႁၵ်ႉယူႇႁ၊ ဢမ်ႇႁဵတ်းဢၼ်ၵဝ်ႁၵ်ႉသေ ၵဝ်ဢမ်ႇမီးတၢင်းသိူဝ်းၸွမ်းၵၢၼ်လႆႈႁ ၼႆ ထၢမ်ၶိုၼ်းတူဝ်ၵဝ်ႇယူႇ။

ၶႃႈၵေႃႈၵိုတ်းလိုဝ်ႈပႅတ်ႈလွင်ႈပၢႆးဝူၼ်ႉဢၼ်ၼႆႉသေ ၶဝ်ႈၵႂႃႇႁႃတူၺ်းၵၢၼ်ၼႂ်း LinkedIn ၊ လႆႈလူမႅၼ်ႈ လိၵ်ႈႁူဝ်ၼိုင်ႈ။ တႅမ်ႈၼႄလွင်ႈဝႃႈ မီးၵူၼ်းႁဵတ်းၵၢၼ်သွင်ၵေႃႉ။

• ၵူၼ်းႁဵတ်းၵၢၼ်သွင်ၵေႃႉ

ၵူၼ်းၵေႃႉမၢႆၼိုင်ႈ ႁဵတ်းၵၢၼ် ဢၼ်တူဝ်ၵဝ်ႇႁၵ်ႉ (Passion Mindset)၊ ထႅင်ႈၵေႃႉၼိုင်ႈသမ်ႉ ပဵၼ်ၵူၼ်း ဢၼ်ၶတ်းၸႂ်ႁၵ်ႉၵၢၼ်တူဝ်ၵဝ်ႇလႄႈၶတ်းၸႂ်ႁႂ်ႈလူင်ႉလႅၼ်ႇၼႂ်းၵၢၼ် ဢၼ်တူဝ်ၵဝ်ႇႁဵတ်း (Craftman Mindset)။ 

• ၵေႃႉဢၼ်ႁဵတ်းၵၢၼ် ဢၼ်တူဝ်ၵဝ်ႇႁၵ်ႉ (Passion Mindset)

ၵူၼ်းၵေႃႉမၢႆၼိုင်ႈ ၵေႃႉဢၼ်ႁဵတ်းၵၢၼ် ဢၼ်တူဝ်ၵဝ်ႇႁၵ်ႉ (Passion Mindset) ၼၼ်ႉ မၼ်းတႅမ်ႈဝႆႉဝႃႈ ꧦ ၵူၼ်းၵေႃႉၼႆႉ တေလိူၵ်ႈႁဵတ်းၵၢၼ် ဢၼ်ၶဝ်ႁၵ်ႉၵူၺ်း၊ ပေႃးဝႃႈ ဢမ်ႇပႆႇၸႂ်ႈ ပႆႇမႅၼ်ႈၵၢၼ်ဢၼ်ၶဝ်ႁၵ်ႉ ၶဝ်တေပွႆႇၽႃႈပႅတ်ႈသေ ႁႃတူၺ်းထႅင်ႈၵၢၼ်တၢင်ႇဢၼ်။ ၵူၼ်းၸိူဝ်းၼႆႉ ၵွပ်ႈၶဝ်ၵုမ်ႇၸွမ်းႁႃၵၢၼ်ဢၼ်ၶဝ် ႁၵ်ႉၵူၺ်းလႄႈ ၶဝ်ဢမ်ႇပၵ်းၸႂ်ၼႂ်းၼႃႈၵၢၼ် ဢၼ်ယူႇပႃႈၼႃႈၶဝ်မိူဝ်ႈလဵဝ်၊ ယၼ်ႉၼၼ်လႄႈ ၶဝ်ဢမ်ႇပေႃး မီးတၢင်းသိူဝ်းၵႃႈႁိုဝ်၊ မၢင်ၸိူဝ်းၵုမ်ႇၸႂ်ႉၶၢဝ်းယၢမ်းသေ ၸွမ်းႁႃဢၼ်ၶဝ်ႁၵ်ႉလႄႈ မိူဝ်ႈၶဝ်ႁႃထူပ်းဢၼ်ၶဝ် ႁၵ်ႉၼၼ်ႉ ၶၢဝ်းယၢမ်းၶဝ်ပေႃးတူၵ်းလိုၼ်းၼႃႇယဝ်ႉꧦ ၼႆယူႇ။

လိူဝ်သေၼၼ်ႉ ယင်းသိုပ်ႇတႅမ်ႈၼေထႅင်ႈဝႃႈ ꧦၵူၼ်းၵေႃႉမၢႆၼိုင်ႈၼႆႉ ၵွပ်ႈၶဝ်ၵုမ်ႇဝူၼ်ႉဝႃႈ ၵၢၼ်ဢၼ်ၶဝ်ႁဵတ်း ယူႇမိူဝ်ႈလဵဝ်ၼႆႉ ဢမ်ႇၸႂ်ႈဢၼ်ၶဝ်ႁၵ်ႉလႄႈ ၶဝ်တေဢမ်ႇတၼ်းပၵ်းၸႂ်သေ ႁဵၼ်းႁူႉၼိူဝ်ၵၢၼ် ဢၼ်ၶဝ်ႁဵတ်းယူႇ၊ ယွၼ်ႉၼၼ်လႄႈ ၵူၼ်းၸိူဝ်းၼႆႉ ဢမ်ႇသူႈမီးၼမ်ႉၵတ်ႉ ၼႂ်းၵၢၼ်ဢၼ်လႂ်တေႉတေႉ၊ ၶဝ်တေႁဵတ်းၵၢၼ်သင်ၵေႃႈ တေဝူၼ်ႉဝႃႈ ၵၢၼ်ဢၼ်ၼႆႉ တေပၼ်ၽွၼ်းလီ တေႃႇၵဝ်ၸိူင်ႉႁိုဝ် ၼႆတႃႇသေႇꧦ  ၼႆယဝ်ႉ။

• ၵူၼ်းၵေႃႉၶတ်းၸႂ်ႁႂ်ႈလူင်ႉလႅၼ်ႇၼႂ်းၵၢၼ် ဢၼ်တူဝ်ၵဝ်ႇႁဵတ်း (Craftman Mindset)

 
ၵူၼ်းၵေႃႉမၢႆသွင် ၵေႃႉဢၼ်ၶတ်းၸႂ်ႁၵ်ႉၵၢၼ်တူဝ်ၵဝ်ႇလႄႈၶတ်းၸႂ်ႁႂ်ႈလူင်ႉလႅၼ်ႇၼႂ်းၵၢၼ် ဢၼ်တူဝ်ၵဝ်ႇႁဵတ်း (Craftman Mindset)။ ၵူၼ်းၵေႃႉၼႆႉသမ်ႉ ဢမ်ႇဝႃႈတေႁဵတ်းၵၢၼ်သင်ၵေႃႈယဝ်ႉ ၶဝ်တေဝူၼ်ႉဝႃႈ ၵဝ်တေႁဵတ်းႁိုဝ် ႁႂ်ႈၵၢၼ်ဢၼ်ၼႆႉ ပၼ်ၽွၼ်းလီတေႃႇၵဝ် ၼႆယဝ်ႉ။ ၵူၼ်းၵေႃႉၼႆႉ ႁဵတ်းၵၢၼ်သင်ၵေႃႈယဝ်ႉ မၼ်းတေၶတ်းၸႂ်ႁဵတ်း ႁႂ်ႈမၼ်းပေႃးလူင်ႉလႅၼ်ႇၼႂ်းၵၢၼ်ဢၼ်မၼ်းႁဵတ်း၊ မၼ်းတေပၵ်းၸႂ်ၼိူဝ်ၵၢၼ် ဢၼ်မၼ်းႁဵတ်းၼၼ်ႉသေ ၶတ်းၸႂ်မူၼ်ႈၸွမ်းၵၢၼ်ဢၼ်မၼ်းႁဵတ်းယူႇၼၼ်ႉ ၼႆယဝ်ႉ။ ယွၼ်ႉပိူဝ်ႈႁဵတ်းၸိူင်ႉၼႆလႄႈ ဢၼ်မၼ်းလႆႈၼၼ်ႉ မီးယူႇသၢမ်လွင်ႈ

1. မေႃၵၢၼ်တေႉတေႉ၊ လႆႈၼမ်ႉၵတ်ႉၼႂ်းၼႃႈၵၢၼ် (Mastery)
2. ပိုင်ႈဢိင်တူဝ်ၵဝ်ႇလႆႈ (Autonomy)
3. မီးလွင်ႈၸမ်ၸႂ်ၵူၼ်းၼမ်၊ ၵူၼ်းၼမ်ၶႂ်ႈယူႇသဝ်းၵွင်ႉၵၢႆႇၸွမ်း (Relatedness) ၸိူဝ်းၼႆႉယဝ်ႉ။

ၵူၼ်းဢၼ်လႆႈႁဵတ်းၵၢၼ် ဢၼ်တူဝ်ၵဝ်ႇႁၵ်ႉသေ ဢွင်ႇမၢၼ်ၼၼ်ႉ မၼ်းမီးဢေႇတေႉတေႉ။ ၼပ်ႉၵေႃႉမၼ်းယင်းလႆႈယူႇ။ တီႈတေႉမၼ်း ၵူၼ်းႁဝ်းၵမ်ႈၼမ် လႆႈႁဵတ်းၵၢၼ် ဢၼ်တူဝ်ၵဝ်ႇဢမ်ႇႁၵ်ႉၼၼ်ႉၵူၺ်း။ဢမ်ႇလႆႈႁဵတ်းၵၢၼ် ဢၼ်တူဝ်ၵဝ်ႇႁၵ်ႉၼၼ်ႉ ဢမ်ႇမီးတၢင်းသိူဝ်းလႆႈႁ ၼႆဢမ်ႇၸႂ်ႈ။ ၵူၼ်းႁဝ်းၶႃႈၼႆႉမၼ်းယူႇတီႈပၢႆးဝူၼ်ႉႁဝ်းလႄႈ ၸႂ်ႁဝ်းၵူၺ်း။ ႁဝ်းလူဝ်ႇမေႃဢဝ်ပၢႆးဝူၼ်ႉ ဢၼ်လီသေ ဝူၼ်ႉၼိူဝ်ၼႃႈၵၢၼ် ဢၼ်တူဝ်ၵဝ်ႇလႆႈႁဵတ်းယူႇၼၼ်ႉၵူၺ်း။ ပေႃးႁဝ်းဝူၼ်ႉ တေဢဝ်ၽွၼ်းလီ ၼႂ်းၼႃႈၵၢၼ် ဢၼ်တူဝ်ၵဝ်ႇႁဵတ်းယူႇၼၼ်ႉႁႂ်ႈလႆႈၸိုင် ႁဝ်းတိုၼ်းတေဢမ်ႇဢိမ်ႇမိူဝ်ႇၼႂ်းၵၢၼ် ဢၼ်ႁဝ်းႁဵတ်း။ ႁႂ်ႈဝူၼ်ႉဝႃႈ မၼ်းပဵၼ်သုၼ်ႇလီတိုဝ်ႉတၢင်းၼိုင်ႈ ဢၼ်ပၼ်မႃးတႃႇႁဝ်း။ ပေႃးႁဵတ်းၼႆ ၵၢၼ်ၵေႃႈႁဵတ်းလႆႈၼမ်၊ ၼမ်ႉၵတ်ႉၵေႃႈတေလႆႈ၊ တၢင်းသိူဝ်းၵေႃႈတေလႆႈ၊ လွင်ႈၼပ်ႉယမ်ၵူၼ်းႁူမ်ႈႁဵတ်းၵၢၼ်ၸွမ်းၵၼ်ၵေႃႈတေလႆႈ ၼႆယဝ်ႉ။

မွၼ်းၶိူဝ်း