ၸိူၵ်ႈ Rope

မီးယူႇပွၵ်ႈၼိုင်ႈ ၵူၼ်းၸၢႆးၵေႃႉၼိုင်ႈ လတ်းၵႂႃႇႁိမ်းၶွၵ်ႈလဵင်ႉၸၢင်ႉတီႈၼိုင်ႈ။ မိူဝ်ႈၽွင်းၼၼ်ႉ မၼ်းလႆႈႁၼ်ၸၢင်ႉလူင်ၶဝ် ဢၼ်ဢဝ်ၸိူၵ်ႈလဵၵ်ႉလဵၵ်ႉဢွၼ်ႇသေ မတ်ႉဝႆႉၼၼ်ႉလႄႈ မၼ်း ၸၢႆးၵိုင်ႉ 

ၵၢင်ႉၵိုတ်းၵႂႃႇသေ ဝူၼ်ႉငဝ်မိုင်ယူႇ။ မၼ်းၸၢႆးဝူၼ်ႉဝႃႈꧦ ႁဵတ်းသင်ၼေႃး ၸၢင်ႉလူင်ၸိူဝ်းၼႆႉ တူဝ်ၵေႃႈယႂ်ႇ၊ ႁႅင်းၵေႃႈယႂ်ႇ လၢၵ်ႈမႆႉယႂ်ႇမႆႉလူင်ၵေႃႈလႆႈ၊ ၼႂ်းတူဝ်သတ်းလူင်တၢင်းသဵင်ႈၼႆႉ ၶဝ်တူဝ်ယႂ်ႇ ႁႅင်းယႂ်ႇသေပိူၼ်ႈ ယဝ်ႉ။ တီႈၼႆႈ ၶွၵ်ႈၵေႃႈဢမ်ႇမီး ယဝ်ႉၵေႃႈ ဢမ်ႇလႆႈဢဝ်ၸိူၵ်ႈလဵၵ်းမတ်ႉဝႆႉ ၵွမ်ႉၵူၺ်းမီးၸိူၵ်ႈလဵၵ်ႉလဵၵ်ႉ ဢွၼ်ႇသဵၼ်ႈၼိုင်ႈ မတ်ႉဝႆႉၶႃၽၢႆႇၼႃႈၶဝ်ၶွၼ်ၼိုင်ႈၵူၺ်း ႁဵတ်းသင်ၶဝ် ဢမ်ႇတိုတ်ႉၸိူၵ်ႈၸိူဝ်းၼႆႉၶၢတ်ႇသေ ပႆၢႈၵႂႃႇယူႇတီႈၼႂ်းထိူၼ်ႇလိုၵ်ႉလူင်ၸိူဝ်းၼၼ်ႉၼေႃးꧦ ၼႆယူႇ။

ၵူၼ်းၸၢႆးၵေႃႉၼၼ်ႉ လႆႈႁၼ်ၵူၼ်းလဵင်ႉၸၢင်ႉၶဝ် မီးယူႇႁိမ်းၸၢင်ႉလူင်ၸိူဝ်းၼၼ်ႉလႄႈ မၼ်းၸင်ႇ ၵႂႃႇတွင်ႈထၢမ်တူၺ်းလွင်ႈတၢင်းမၼ်းတီႈၵူၼ်းလဵင်ႉၸၢင်ႉၶဝ်ၸိူဝ်းၼၼ်ႉယူႇ။ မၼ်းၸၢႆးထၢမ်ၵႂႃႇ ၸွမ်းၼင်ႇ ဢၼ်မၼ်းၸၢႆးဝူၼ်ႉၼႂ်းၸႂ်မၼ်းၼၼ်ႉယူႇ။ ၵူၼ်းလဵင်ႉၸၢင်ႉၵေႃႉၼိုင်ႈ ၸင်ႇတွပ်ႇဝႃႈꧦ ၸၢင်ႉလူင်ၸိူဝ်းၼႆႉ မိူဝ်ႈၽွင်းၶဝ်တူဝ်လဵၵ်ႉၼၼ်ႉ ႁဝ်းဢဝ်ၸိူၵ်ႈလဵၵ်ႉလဵၵ်ႉဢွၼ်ႇၸိူဝ်းၼႆႉသေ မတ်ႉၶဝ်မႃးယဝ်ႉ။ မိူဝ်ႈၽွင်းၶဝ် တူဝ်လဵၵ်ႉၼၼ်ႉ ၸိူၵ်ႈလဵၵ်ႉလဵၵ်ႉၸိူဝ်းၼႆႉ ၵႅၼ်ႇၶႅင်တႃႇတေၸင်ႈၶၢမ်ႇႁႅင်းၸၢင်ႉဢွၼ်ႇၶဝ်ၼၼ်ႉလႆႈလီလီယူႇ လႄႈ ၶဝ်ၶတ်းၸႂ်တိုတ်ႉၶၢတ်ႇၵႃႈႁိုဝ်ၵေႃႈ ၶဝ်ဢမ်ႇပေႉႁႅင်းၸိူၵ်ႈၸိူဝ်းၼႆႉလႆႈ။ ႁဵတ်းၼႆသေ ၶဝ်ၵေႃႈယုမ်ႇဝႃႈ ၶဝ်ဢမ်ႇတိုတ်ႉၶၢတ်ႇၸိူၵ်ႈၼႆႉလႆႈၼႆယူႇ။ ၽိူဝ်ႇထိုင်ၶဝ်တူဝ်ယႂ်ႇမႃးၼၼ်ႉ ၶဝ်မီးႁႅင်းတႃႇတေတိုတ်ႉၶၢတ်ႇ ၸိူၵ်ႈၸိူဝ်းၼႆႉလႆႈယူႇသေတႃႉ ၵူၺ်းၵႃႈ ယွၼ်ႉပိူဝ်ႈၶဝ်ယုမ်ႇဝႃႈ ၶဝ်ဢမ်ႇတိုတ်ႉၶၢတ်ႇ ဢမ်ႇပေႉႁႅင်းၸိူၵ်ႈ ၸိူဝ်းၼႆႉလႆႈၼႆလႄႈ ၶဝ်ၸင်ႇဢမ်ႇတိုတ်ႉၶၢတ်ႇၸိူၵ်ႈၸိူဝ်းၼႆႉသေ ပႆၢႈၵႂႃႇတီႈၵႆ တီႈၼႂ်းထိူၼ်ႇလိုၵ်ႉၶဝ်လႂ် ၸိူဝ်းၼၼ်ႉယဝ်ႉꧦ ၼႆယူႇ။ ၵူၼ်းၸၢႆးၵေႃႉၼၼ်ႉၵေႃႈ ပွင်ႇၸႂ်ၵႂႃႇသေ လႆႈတွၼ်ႈသွၼ်တီႈၼႆႈၵႂႃႇတၢင်းၼမ်ယူႇ ယဝ်ႉ။

မိူၼ်ၼင်ႇၸၢင်ႉၼၼ်ႉၼင်ႇၵဝ်ႇ ၵူၼ်းႁဝ်းၵမ်ႈပႃႈၼမ်ၵေႃႈ ယွၼ်ႉပိူဝ်ႈ လွင်ႈတၢင်းဢၼ်ၸဝ်ႈၵဝ်ႇ ယၢမ်ႈၶတ်းၸႂ် သုမ်းမႃးပွၵ်ႈၼိုင်ႈၼၼ်ႉသေလႄႈ ဢဝ်ပၢႆးဝူၼ်ႉဢၼ်ယုမ်ႇတူဝ်ၸဝ်ႈၵဝ်ႇဝႃႈ ၵဝ်ဢမ်ႇႁဵတ်း ပဵၼ်လႆႈၼၼ်ႉ ထင်ဢွင်းယူႇဝႆႉၼႂ်းၸႂ်ၸဝ်ႈၵဝ်ႇသေ ယွမ်းသုမ်းပူၵ်းမိုဝ်းတေႃႇ ပၼ်ႁႃၼႂ်းၸူဝ်ႈပၢၼ် မီးတၢင်း ၼမ်။ တီႈတေႉၸိုင် လွင်ႈတူၵ်းသုမ်းဢၼ်ဝႃႈၼၼ်ႉ ပဵၼ်တွၼ်ႈၼိုင်ႈ ၼႂ်းၵၢၼ်ႁဵၼ်းယဝ်ႉ။ ဢမ်ႇၸႂ်ႈတႃႇဢဝ် မႃးဝူၼ်ႉပဵၼ်တီႈၸႂ်တူၵ်း။ 

ပိၼ်ႇတႅမ်ႈ - မွၼ်းၶိူဝ်း (မိူင်းၼွင်)