လုၵ်ႈၸႆၢးၽူႈမၢၵ်ႈ ယဵၼ်းပဵၼ်ၵူၼ်းယွၼ်း

မိူဝ်ႈၵွၼ်ႇပူၼ်ႉမႃးၼၼ်ႉ မီးၽူႈမၢၵ်ႈလူင်သွင်ၵေႃႉၽူဝ်မေး ဢၼ်မီးငိုၼ်းပႅတ်ႇသိပ်းၵုတေႇၼၼ်ႉယဝ်ႉ။ ၽူႈ မၢၵ်ႈသွင်ၵေႃႉၽူဝ်မေးၼႆႉ မီးဝႆႉလုၵ်ႈၸႆၢးဢွၼ်ႇၵေႃႉၼိုင်ႈ။ ၶႃသွင်ပူႇဢွၵ်ႇ ႁၵ်ႉလုၵ်ႈၸၢႆးၶႃတေႉတေႉ။ 

ယွၼ်ႉႁၵ်ႉလုၵ်ႈ ၸၢႆးၶႃၼႃႇလႄႈ ဢမ်ႇၶႂ်ႈႁႂ်ႈလုၵ်ႈၸႆၢးၶႃ လႆႈႁဵတ်းၵၢၼ်တုၵ်ႉၶယၢပ်ႇၽိုတ်ႇသင်။ ၶိင်းသထေး လႄႈၼႆၢးသထေး သွင်ၶႃပူႇဢွၵ်ႇဝူၼ်ႉဝႃႈ ꧦ ငိုၼ်းၶမ်းဢၼ်ႁဝ်းမီးၼႆႉ ၵိၼ်တင်းၸူဝ်ႈတင်းၸၢတ်ႈၵေႃႈ ဢမ်ႇသဵင်ႈလႆႈꧦ ဝူၼ်ႉၸိူင်ႉၼႆသေ ဢၼ်ပဵၼ်လုၵ်ႈၸၢႆးဢွၼ်ႇၶႃၼၼ်ႉၵေႃႈ ထိုင်ၶၢဝ်းႁဵၼ်းသွၼ်ဢဝ်တၢင်းႁူႉ တၢင်းမေႃၵေႃႈ ဢမ်ႇသူင်ႇၵႂႃႇသွၼ်၊ ထိုင်ပၢၼ်ဢၼ်လူဝ်ႇလႆႈႁဵတ်းၵၢၼ် ၵႃႉၵႃႉၶႆၢၶႆၢၵေႃႈ ဢမ်ႇပွႆႇၵႂႃႇႁဵတ်း ၵၢၼ်ၵႃႉၵၢၼ်ၶႆၢသင်။ ၵူၺ်းၵုမ်ႇပွႆႇပၼ်ႁႂ်ႈလုၵ်ႈၸႆၢးဢွၼ်ႇၶႃ ယူႇလႆၢၵိၼ်လၢႆ၊ ယူႇတီႈႁိူၼ်းသေ သွၼ်ပၼ် တၢင်းမူၼ်ႈတၢင်းၵျေႃႇ လွင်ႈၵႃႈလွင်ႈဝႅၼ်ၵူၺ်း။ ထိုင်မိူဝ်ႈလုၵ်ႈၸႆၢးၶႃ ထိုင်ပၢၼ်ဢႃႇယုလူဝ်ႇလႆႈ တေႇၼႃႈ ႁိူၼ်းမႃးယဝ်ႉၼၼ်ႉ ၶႃၸင်ႇဢဝ်ၵူပ်ႉၵူႈပၼ်တၢင်း လုၵ်ႈယိင်းသထေး ဢၼ်ယူႇၼႂ်းဝဵင်းလဵဝ်ၵၼ်သ သမ်ႉမီး ငိုၼ်းၶမ်း ပႅတ်ႇသိပ်းၵုတေႇ မိူၼ်ၶဝ်ၼၼ်ႉယူႇယဝ်ႉ။

မိူဝ်ႈဢၼ်သထေးသွင်ပူႇဢွၵ်ႇ ဢႃႇယုယႂ်ႇၵႄႇမႃးၼၼ်ႉ ၸင်ႇတၢႆသေ ဝႆႉပႅတ်ႈလုၵ်ႈၸၢႆး ဢၼ်ဢမ်ႇမေႃႁဵတ်း သင်ၼၼ်ႉယူႇယဝ်ႉ။ လုၵ်ႈၸၢႆးသထေးလူင်သွင်ပူႇဢွၵ်ႇၼႆႉ ယွၼ်ႉပိူဝ်ႈဢမ်ႇလႆႈၶိုၼ်ႈႁဵၼ်း၊ လိၵ်ႈၵေႃႈဢမ်ႇ မေႃ၊ ၵၢၼ်ၵႃႉၵၢၼ်ၶၢႆ၊ လွင်ႈဝၢင်းၽႅၼ်ၼႃႈၵၢၼ်တႃငၢၼ်းၵေႃႈ ဢမ်ႇႁူႉသင်လႄႈ ယူႇမူၼ်ႈမူၼ်ႈသိူဝ်းသိူဝ်း ၸွမ်းၸေးၸိမ်ႇ ဢၼ်ပေႃႈမႄႈႁဵတ်းႁႃဝႆႉသေ ၵိၼ်လဝ်ႈၵိၼ်ယႃႈ၊ တေႃႇၽၢႆႉ၊ လဵၼ်ႈၸွမ်းဢူၺ်းၵေႃႉ မိူၵ်ႈလိူင်းသေ ဢဝ်ငိုၼ်းၶမ်း မူတ်းသဵင်ႈၵႂႃႇယူႇယဝ်ႉ။ ၵမ်းလိုၼ်းသုတ်းမႃး ယွၼ်ႉပိူဝ်ႈ ငိုၼ်းၶမ်း ဢၼ်မီးဝႆႉ ၼၼ်ႉ မီးဢၼ်ဢဝ်ၸႂ်ႉၸၢႆႇၵူၺ်းသေ ဢမ်ႇႁဵတ်းႁႂ်ႈၽေႈတိုၼ်းမႃးလႄႈ လုၵ်ႈၸၢႆးၽူႈမၢၵ်ႈလူင်လႄႈတၢင်း မႄးၼၢင်းမၼ်း ၸင်ႇလႆႈႁွတ်ႈထိုင် ပဵၼ်ၽဝၸူဝ်ႈပၢၼ်ၵူၼ်းယွၼ်းၵႂႃႇယူႇယဝ်ႉ။ 

ပေႃးမႃးတူၺ်း ၼႂ်းဢပုမ်ႇဢွၼ်ႇႁူဝ်ၼႆႉၸိုင် မီးတွၼ်ႈသွၼ် ဢၼ်လီဢဝ်ပဵၼ်တွၼ်ႈသွၼ်တႃႇၽဝၸူဝ်ႈပၢၼ်တူဝ်ၸဝ်ႈၵဝ်ႇတၢင်းၼမ်ယူႇယဝ်ႉ။ ယွၼ်ႉပိူဝ်ႈ မိူဝ်ႈတိုၵ်ႉၼုမ်ႇတိုၵ်ႉၵမ်ၼၼ်ႉ လုၵ်ႈၸၢႆးသထေးၼႆႉ ဢမ်ႇလႆႈၺႃးပေႃႈမႄႈလီ ဢၼ်ဝူၼ်ႉၵႂၢင်ႈႁၼ်ၵႆ တႃႇၽဝၸူဝ်ႈပၢၼ်လုၵ်ႈၸၢႆးၶႃလႄႈ လုၵ်ႈၸၢႆးၶႃသွင်ပူႇဢွၵ်ႇမီးသုၼ်ႇလီတိုဝ်ႉတၢင်းတႃႇလႆႈႁဵၼ်းဢဝ်တၢင်းႁူႉတၢင်းႁၼ်ၼမ်ၼမ်ယူႇသေတႃႉ ဢမ်ႇလႆႈႁဵၼ်းမႃးသေ ထိုင်မိူဝ်ႈယႂ်ႇမႃးၼၼ်ႉၵေႃႈ ဢမ်ႇလႆႈပဵၼ်လုၵ်ႈလၢင်းလီ ၵေႃႉဢၼ်ၵိုင်ႇထိူၵ်ႈပုတ်ႈဢဝ်ၶူဝ်းပူၺ်ႈ ဢၼ်ပေႃႈမႄႈႁႃဝႆႉ။ လိူဝ်သေၼၼ်ႉဢမ်ႇၵႃး ၼႂ်းဢပုမ်ႇဢွၼ်ႇႁူဝ်ၼႆႉ လႆႈၼႄဝႆႉဝႃႈ ၵူၼ်းဢမ်ႇမီးတၢင်းႁူႉၼႆႉ ၸၢင်ႈလႆႈထုၵ်ႇတၢင်းဢူၺ်းၵေႃႉမိူၵ်ႈလိူင်းၶဝ် မႃးလႅၼ်ၵိၼ်ယူႇယဝ်ႉ။ ထႅင်ႈဢၼ်ၼိုင်ႈတႄႉ ၼႂ်းဢပုမ်ႇဢွၼ်ႇႁူဝ်ၼႆႉၼႄပၼ်ဝႃႈ သင်ၸဝ်ႈၵဝ်ႇလႆႈယူႇၸွမ်း တူင်ႇဝူင်းဢၼ်ဢမ်ႇလီၼႆၸိုင် ၶဝ်ၸၢင်ႈၸူဝ်းဢဝ် ၽဝၸူဝ်ႈပၢၼ်ၸဝ်ႈၵဝ်ႇ ၵႂႃႇၸူးတီႈတူၵ်းတႅမ်ႇၼၼ်ႉယဝ်ႉ။

မွၼ်းၶိူဝ်း- သိုပ်ႇတႅမ်ႈပိုၼ်ၽေ